കുട്ടിക്കാലം മുതല്‌ക്കേ എന്റെ സഹജഗുണമായ ഇണക്കത്തിനും മാനവികതയ്ക്കും പേരുകേട്ടവനായിരുന്നു ഞാന്‍. എന്റെ ഹൃദയനൈര്‍മല്യം എന്റെ സഹചാരികളുടെ കണ്ണില്‍ എന്നെ ഒരു പരിഹാസപാത്രമാക്കുവോളം അത്രമേല്‍ പ്രകടമായതായിരുന്നു. വളര്‍ത്തുമൃഗങ്ങളോട് എനിക്കുണ്ടായിരുന്ന വാത്സല്യം നിമിത്തം എന്റെ നാട്ടിലുള്ള ചിലര്‍ എന്നെ പരിഹാസത്തോടെ കണ്ടിട്ടുണ്ട്. എന്റെ സമയത്തിന്റെ അധിക പങ്കും ഞാന്‍ അവയോടൊത്താണ് ചെലവഴിച്ചിരുന്നത്. അവയ്ക്കു തീറ്റി കൊടുക്കുമ്പോഴോ അവയെ താലോലിക്കുമ്പോഴോ എനിക്കു ലഭിച്ചിരുന്ന ആത്മസുഖം മറ്റൊന്നിനും തരാന്‍ കഴിയാത്തതായിരുന്നു. എന്റെ സ്വഭാവത്തിലെ ഈ സവിശേഷത എന്നോടൊത്തു വളരുകയും ഞാന്‍ യൗവനത്തിലെത്തിയപ്പോഴും, എന്റെ മുഖ്യസുഖദായകവിഷയങ്ങളിലൊന്നായി നിലനില്ക്കുകയും ചെയ്തു. വിശ്വസ്തതയും ബുദ്ധിതീക്ഷ്ണതയുള്ളതുമായ ഒരു നായയോട് ഹൃദയബന്ധം സൂക്ഷിക്കുന്നവരായ ആളുകളോട്, മൃഗങ്ങളെ സ്‌നേഹിക്കുന്നതില്‍നിന്നും ഉദ്ഭൂതമാകുന്ന കൃതാര്‍ഥതയുടെ തീവ്രതയെക്കുറിച്ച് വിവരിച്ച് ഞാന്‍ ബുദ്ധിമുട്ടേണ്ട കാര്യമില്ലല്ലോ. മനുഷ്യരുടെ വെറും ക്ഷുദ്രമായ സൗഹൃദവും പൊടിഞ്ഞുപോവുന്ന കൂറും പലപ്പോഴും പരീക്ഷിച്ചറിഞ്ഞിട്ടുള്ള അയാളുടെ ഹൃദയത്തിലേക്ക് നേരിട്ടു കടക്കുന്ന ചിലത് ഒരു മൃഗത്തിന്റെ നിസ്വാര്‍ഥമായതും ത്യഗസമ്പൂര്‍ണമായതുമായ സ്‌നേഹത്തിലുണ്ടായിരിക്കും.
നല്ല പ്രായത്തില്‍തന്നെ ഞാന്‍ വിവാഹിതനാവുകയും എന്റെ ഭാര്യയുടെ പ്രകൃതത്തില്‍ എന്റേതുമായി പൊരുത്തപ്പെടാത്ത ഒന്നുമില്ലെന്നു കണ്ട് സന്തോഷിക്കുകയും ചെയ്തു. ഓമനകളായ വീട്ടുമൃഗങ്ങളോട് എനിക്കുണ്ടായിരുന്ന പക്ഷപാതിത്വം നിരീക്ഷിച്ച അവള്‍, അവയിലെ ഏറ്റവും അംഗീകൃതമായ ഇനത്തില്‍പ്പെട്ടവയെ സമ്പാദിക്കുന്നതിന് തനിക്കു കൈവന്ന ഒരു അവസരവും പാഴാക്കിയില്ല. ഞങ്ങള്‍ക്ക് പക്ഷികളുണ്ടായിരുന്നു. അരയണ്ണങ്ങളും ഗിനികോഴികളും ഒരു നല്ല നായും ഒരു പൂച്ചയുമുണ്ടായിരുന്നു.
ഈ ഒടുവില്‍ പറഞ്ഞത്, തനി കറുപ്പായ, എടുത്തുപറയത്തക്ക വലിപ്പവും സൗന്ദര്യവുമുള്ള, അദ്ഭുതപ്പെടുത്തുന്ന ബുദ്ധിശക്തിയുള്ള ഒന്നായിരുന്നു. അവന്റ വിവേകത്തെക്കുറിച്ചു പറയുമ്പോള്‍, തന്റെ ഹൃദയത്തെ അന്ധവിശ്വാസംകൊണ്ട് അല്പംപോലും നിറംപിടിപ്പിക്കാത്ത എന്റെ ഭാര്യ, എല്ലാ കറുത്തപൂച്ചകളും വേഷപ്രച്ഛന്നരായ മന്ത്രവാദികളാണെന്ന പുരാതനമായ ജനകീയ സങ്കല്പം ഉദാഹരണമായി പ്രയോഗിക്കാറുണ്ട്. ഈ വിഷയത്തെ അവള്‍ സദാ ഗൗരവമായി എടുത്തിരുന്നുവെന്നല്ല. അന്നു സംഭവിച്ചതും ഇപ്പോള്‍ സ്മരിക്കപ്പെടേണ്ടതുമായ സംഭവത്തേക്കാള്‍ വലിയ ഒരു കാരണത്താലുമല്ല ഞാന്‍ അത് ഇവിടെ സൂചിപ്പിക്കുന്നത്.
അഭിപ്രായങ്ങളൊന്നുമില്ല :
ഒരു അഭിപ്രായം പോസ്റ്റ് ചെയ്യൂ